Podaqra nədir?

Podaqra – artritin bir növüdür, onun əsas simptomu bir və ya bir neçə oynağın ağrılı iltihabıdır. Bu, insanın qanında sidik turşusunun səviyyəsi 6 mq/dl-dən və ya 360 mkmol/l-dən yuxarı olduqda oynaqlarda sidik turşusu kristallarının formalaşması səbəbindən yaranır. Podaqra uzun illər ərzində müxtəlif səbəblərdən, o cümlədən genetik amillər və ya purinlə zəngin olan qida rasionu nəticəsində yarana bilər. Purin qida və içkilərin tərkibində rast gələn və parçalanaraq sidik turşusu əmələ gətirən bir kimyəvi birləşmə növüdür. Purinlər normal qida rasionunun bir hissəsidir, lakin tərkibində purinlərin miqdarının çox olduğu qida məhsulları podaqranın inkişaf etməsinin yüksək riski ilə əlaqələndirilir. Purinlə zəngin olan qida məhsullarına pivə, qırmızı ət, krevetlər və midiyalar kimi dəniz canlıları aiddir. 

Xəstəliyin erkən mərhələləri qanda sidik turşusunun səviyyəsinin 6 mq/dl-dən və ya 360 mkmol/l-dən yuxarı qalxması ilə xarakterizə olunur, bu vəziyyət "hiperurikemiya" adlanır; podaqranın əlamətləri və simptomları bir neçə il sonra meydana çıxmağa başlayır. Podaqra çoxsistemli bir xəstəlikdir, bu isə o deməkdir ki, podaqra bədənin müxtəlif hissələrini, məsələn, oynaqları, vətərləri, dərini və qulaq qığırdaqlarını zədələyə bilər. Bunun səbəbi qanda sidik turşusunun səviyyəsinin yüksəlməsidir. Podaqra xroniki xəstəlikdir, yəni insanın ömrünün sonunadək müalicə tələb edir.